Salve a tuti,
manca propio poco ramai a la granda
FESTA DEI VENETI 2006
el pì gran evento de Cultura Veneta
01 - 02 - 03 de Setenbre 2006
a Sitadela / Cittadella (PD)
la Festa del Popolo Veneto
Co i Patrosìni de la Giunta Regionale del Veneto,
del Comùn e Pro Loco de Sitadela (PD),
del Comùn de Vò (PD)
e de tute le provìnse del Veneto
Anca sto ano torna a Sitadela (PD) la granda Festa dei Veneti, el pì gran evento de Cultura Veneta!
Semo rivài a la 3° edision de la Festa che la taca xà da vènare sera 01 de setenbre co el
convegno de Storia Veneta sol "1866 - il Plebiscito di annessione del Veneto all'Italia: analisi, documenti e conseguenze".
El Convegno el se tegnarà inte la sala "Torre di Malta" a Sitadela da le ore 20.30 in
vanti.
Pa sabo 02 de setenbre xe organexà on concerto in piàsa a Sitadela co mùxica veneta e
irlandexe e tanta bìra, na serata organexà pai xovani da le 19.00 fin note.
Domenega 03 de setenbre xe el dì pì inportante: da matina fin sera difati pa tuto el sentro de la sità ghe sarà on mucio de
spetacoli e de eventi culturali veneti; el xe on dì dedicà tuto ai Veneti, a le nostre tradision e a la nostra
cultura. El sarà on evento da no pèrdare, co tanti grupi e asociasion culturali che partesiparà, tuti insieme co la voja de tegner
vive e de valorixar le nostre tradision venete, vero patrimonio de tuti i veneti.
La Cultura Veneta sarà
la protagonista de la Festa dei Veneti: pa tuto el dì sora del palco ghe sarà artisti, cabaretìsti, muxisìsti e cantanti
e pa tute led strade del sentro podarè catar prodoti nostrani de la nostra tèra, banchéti co magnare veneto e on mucio de artejani
e de espoxituri co materiale de cultura e identità veneta.
La Festa dei Veneti la sarà inportante anca parché vegnerà dimandà che
ghe sia na tutela, na valorixasion e na difuxion pì grande de la cultura e de la storia veneta, soratuto inte le scole, e el riconosimento regionale de la Lengoa Veneta (proposta 'ncora ferma in Rejon).
Pa sta edision de la Festa dei Veneti, el "Comitato di Sostegno 8 di San Marco - CS8" el se gà oferto de portar e de métare in espoxision al publico pa la domenega el Tanko, el famoxo blindà che xe stà doprà dai Serenissimi l'8 del Majo del 1997 in Piàsa San Marco a Venèsia e che'l xe deventà 'ramai on sinbolo de storia veneta.
Struca qua pa lèxar tuto el progràma de la Festa dei Veneti
Pa informasion podì ciamare el nùmaro 347/4653711 o scrìvarne a info@raixevenete.net
Saludi cordiali
da la Redasión de Raixe Venete
|