Salve a tuti,
manca propio poco 'ramai a la granda FESTA DEI VENETI 2006, el pi' gran evento de Cultura Veneta: 01 - 02 - 03 de Setenbre 2006 a Sitadela / Cittadella (PD) la Festa del Popolo Veneto. Co i Patrosi'ni de la Giunta Regionale del Veneto, del Comu'n e Pro Loco de Sitadela (PD), del Comu'n de Vo' (PD) e de tute le provi'nse del Veneto.
Anca sto ano torna a Sitadela (PD) la granda Festa dei Veneti, el pi' gran evento de Cultura Veneta! Semo riva'i a la 3° edision de la Festa che la taca xa' da ve'nare sera 01 de setenbre co el
convegno de Storia Veneta sol "1866 - il Plebiscito di annessione del Veneto all'Italia: analisi, documenti e conseguenze".
El Convegno el se tegnara' inte la sala "Torre di Malta" a Sitadela da le ore 20.30 in
vanti.
Pa sabo 02 de setenbre xe organexa' on concerto in pia'sa a Sitadela co mu'xica veneta e
irlandexe e tanta bi'ra, na serata organexa' pai xovani da le 19.00 fin note.
Domenega 03 de setenbre xe el di' pi' inportante: da matina fin sera difati pa tuto el sentro de la sita' ghe sara' on mucio de
spetacoli e de eventi culturali veneti; el xe on di' dedica' tuto ai Veneti, a le nostre tradision e a la nostra
cultura. El sara' on evento da no pe'rdare, co tanti grupi e asociasion culturali che partesipara', tuti insieme co la voja de tegner
vive e de valorixar le nostre tradision venete, vero patrimonio de tuti i veneti.
la Cultura Veneta sara'
la protagonista de la Festa dei Veneti: pa tuto el di' sora del palco ghe sara' artisti, cabareti'sti, muxisi'sti e cantanti
e pa tute le strade del sentro podare' catar prodoti nostrani de la nostra te'ra, banchéti co magnare veneto e on mucio de artejani
e de espoxituri co materiale de cultura e identita' veneta.
La Festa dei Veneti la sara' inportante anca parche' vegnera' dimanda' che
ghe sia na tutela, na valorixasion e na difuxion pi' grande de la cultura e de la storia veneta, soratuto inte le scole, e el riconosimento regionale de la lengoa Veneta (proposta 'ncora ferma in Rejon).
Pa sta edision de la Festa dei Veneti, el "Comitato di Sostegno 8 di San Marco - CS8" el se ga' oferto de portar e de me'tare in espoxision al publico pa la domenega el Tanko, el famoxo blinda' che xe sta' dopra' dai Serenissimi l'8 del Majo del 1997 in Pia'sa San Marco a Vene'sia e che'l xe deventa' 'ramai on sinbolo de storia veneta.
Struca qua pa le'xar tuto el progra'ma de la Festa dei Veneti
Pa informasion podi' ciamare el nu'maro 347/4653711 o scri'varne a info@raixevenete.net
Saludi cordiali
da la Redasión de Raixe Venete
|