Salve a tuti,
manca propio poco 'rmai ala grand FESTA DEI VENETI 2006, el piu' gran evento de Cultura Veneta: 1 - 2 - 3 de Setenbre 2006 a Sitadela / Cittadella (PD) la Festa del Popolo Veneto. Coi Patrosini dela Junta Rejonale del Veneto, del Comun e Pro Loco de Sitadela (PD), del Comun de Vo' (PD) e de tute le provincie del Veneto.
Anca 'sto ano torna a Sitadela (PD) la grand Festa dei Veneti, el piu' gran evento de Cultura Veneta! Semo rivai ala terxa edision dela Festa che la scominsia xa' da venare sera primo de setenbre coel convegno de Storia Veneta sul "1866 - il Plebiscito di annessione del Veneto all'Italia: analisi, documenti e conseguenze".
El Convegno el se tegnara' intela sala "Torre di Malta" a Sitadela dale ore 20.30 in 'vanti.
Par sabo 2 de setenbre xe organixa' un concerto in piasa a Sitadela co muxica veneta e irlandexe e tanta bira, 'na serada organixada par i xovani dale 19.00 fin note.
Domenega 3 de setenbre xe el di' piu' inportante: da matina fin sera difati par tuto el sentro dela sita' ghe sara' un mucio de spetacoli e de eventi culturali veneti; el xe un di' dedica' tuto ai Veneti, ale nostre tradision e ala nostra cultura. El sara' un evento da no perdar, co tanti grupi e asociasion culturali che partecipara', tuti insieme cola voja de tegnar vive e de valorixar le nostre tradision venete, vero patrimonio de tuti i veneti.
La Cultura Veneta sara'
la protagonista dela Festa dei Veneti: par tuto el di' sora del palco ghe sara' artisti, cabaretisti, muxicisti e cantanti
e par tute le strade del sentro podare' trovar prodoti nostrani dela nostra tera, bancheti co magnar veneto e un mucio de artijani
e de espoxitori co materiale de cultura e identita' veneta.
La Festa dei Veneti la sara' inportante anca parche' vegnara' domanda' che ghe sia 'na tutela, 'na valorixasion e 'na difuxion piu' granda dela cultura e dela storia veneta, soratuto intele scuole, e el riconosimento rejonale dela lingua Veneta (proposta 'ncora ferma in Rejon).
Par sta edision dela Festa dei Veneti, el "Comitato di Sostegno 8 di San Marco - CS8" el se ga' oferto de portar e de metar in espoxision al publico par la domenega el Tanko, el famoxo blinda' che xe sta' dopera' dai Serenissimi l'8 de Majo del 1997 in Piasa San Marco a Venesia e che'l xe deventa' 'rmai un sinbolo de storia veneta.
Struca qua par lexar tuto el programa dela Festa dei Veneti
Par informasion pode' ciamar el numaro 347/nnnnnnn o scrivarne a info@raixevenete.net
Saludi cordiali
dala Redasion de Raixe Venete
Eco, cusi' me par mejo! Par mi el xe Trevisan.
|